Monday, July 2, 2018

Putta

ಹೀಗೆಲ್ಲ ಮಾಡೋ ಪುಟ್ಟ ಇವಾಗ ಪ್ರತೀ ಸಲ ಧೋನಿಯನ್ನು  ನೋಡಿ, ಯಾಕೆ ರಿಟೈರ್ ಆದ ಅಂತ ಅಳುತ್ತಾನೆ.

1. ಡೋರೆಮಾನ್ ಎಂಬ ರೋಬೊ ಬೆಕ್ಕಣ್ಣ ಮತ್ತು ಉಡಾಳ ಹುಡುಗ ನೊಬಿಟಾನ ದೊಡ್ಡ ಅಭಿಮಾನಿ ನನ್ನ ಪುಟ್ಟ. ಸುಮಾರು ೯ ವರ್ಷದಿಂದ ಡೋರೆಮಾನ್ ಪುಟ್ಟನ ಜೀವನದ ಭಾಗವಾಗಿದ್ದಾನೆ. ಒಂದು ದಿನ ಎಪಿಸೋಡ್ ನೋಡುತ್ತಾ ಕೂತಿದ್ದವನು ಅಳಲಾರಂಭಿಸಿದ. ಎಷ್ಟು ಸಮಾಧಾನ ಮಾಡಿದರೂ ಅಳು ನಿಲ್ಲುತ್ತಲೇ ಇಲ್ಲ, ಸುಮಾರು ಅರ್ಧ ಮುಕ್ಕಾಲು ಗಂಟೆ ಅತ್ತ ಮೇಲೆ ಅವನು ಹೇಳಿದ್ದಿಷ್ಟು. "ನೊಬಿಟಾ ದೊಡ್ಡವನಾಗಿದ್ದಾನೆ, ಅವನಿಗೊಬ್ಬ ಮಗನೂ ಇದ್ದಾನೆ, ಆದರೆ ಡೋರೆಮಾನ್ ಮಾತ್ರ ಹಾಗೆ ಇದ್ದಾನೆ, ಅವನು ರೋಬೊ ಅಲ್ವ? ನೊಬಿಟಾ ಕೆಲಸ ಮುಗಿಸಿ ಬಂದಿದ್ದಾನೆ, ರಾತ್ರಿಯಾಗಿದೆ. ಡೋರೆಮಾನ್ ಅವನನ್ನು ಕೇಳುತ್ತಾನೆ. ನೊಬಿಟಾ, ಹೋಂ ವರ್ಕ್ ಮುಗಿಸಿದ್ಯಾ? " ಅಂತ. ಅದು ಹೇಳುತ್ತಾ ಮತ್ತಿಷ್ಟು ಅತ್ತ. ಅದಕ್ಕೆ ನೀನ್ಯಾಕೆ ಅಳಬೇಕು ಅಂದೆ. "ನಿಂಗೇನೂ ಅನಿಸಲ್ವಾ, ನಿಂಗರ್ಥ ಆಗಲ್ಲ, ಹೋಗು" ಎಂದು ಸಿಟ್ಟಲ್ಲಿ ಕಿರುಚಿದ. ಆಮೇಲೆ ನಂಗರ್ಥ ಆಯ್ತು ಪುಟ್ಟ ನಿನ್ನ ಫೀಲಿಂಗ್ಸ್, ಡೋರೆಮಾನ್ ಪಾಪ, ಅವನೆಷ್ಟು ಇನ್ನೋಸೆಂಟ್ ಅಂದಾದ ಮೇಲೆ ಮಾತಾಡಿದ್ದು.

2. ಪೋಕೆಮೊನ್ ಪುಟ್ಟನ ಇಷ್ಟದ ಇನ್ನೊಂದು ಕಾರ್ಟೂನು. ಅದ್ರಲ್ಲಿ ಪಿಕಾಚು ಅಂತ ಮುದ್ದು ಮುದ್ದಾಗಿರುವ ಅದೆಂತದೋ ಜೀವಿಯಿದೆ. ಒಬ್ಬ ಹುಡುಗನೊಟ್ಟಿಗೆ ಇರುವ ಅದನ್ನು ದೂರದ ಕಾಡಿಗೆ ತೆಗೆದುಕೊಂಡು ಹೋಗಿ ಅದರ ಹಾಗೆಯೇ ಇರುವ ಪಿಕಾಚುಗಳೊಂದಿಗೆ ಬಿಡುವ ಎಪಿಸೋಡಿಗೂ ಒಂದು ರಾಶಿ ಅತ್ತ. ನಾನು ಕೇಳಿದಾಗ ಮತ್ತದೇ ಡೈಲಾಗ್" ಹೋಗಮ್ಮ , ನಿಂಗೆ ಅರ್ಥ ಆಗಲ್ಲ".

3. ಹೊಪ್ಪ ಝುನ್ಯ ಝುನ್ಯ ಅಂತ ಈ ಪುಟಾಣಿ ಪಿಗ್ಗಣ್ಣ (https://youtu.be/j5yKCUToLSw) ಕುಕಿಗೆ ಆಸೆ ಮಾಡಿ ಕುಣಿದು ಕುಪ್ಪಳಿಸಿ ಒದ್ದಾಡೋದನ್ನು ನೋಡಿ ನಕ್ಕರೂ, ಕೊನೆಗೆ ಅವನ ಕೈಗೆ ಕುಕಿ ಸಿಕ್ಕರೂ ತಿನ್ನಲಾಗದ ಹಾಗೆ ಅವನ ಮುಖಕ್ಕೆ ಗಾಜಿನ ಜಾಡಿ ಬಿದ್ದಾಗ ಅಯ್ಯೋ ಪಾಪ ಎಂದೆ. "ಅಮ್ಮ, ನಿಂಗೆ ಬೇಜಾರಾಯ್ತಾ?, ಬೇಜಾರು ಮಾಡ್ಕೋಬೇಡಮ್ಮ ಅದು ಅನಿಮೇಷನ್ " ಅಂದ ನನ್ನ ಪುಟ್ಟ!

No comments:

Post a Comment