ಮೌನ

ಅದೋ ಅಲ್ಲಿ ಮೌನ, 

ಹಲೋ ನೀ ಮೌನವೆ?

ಉಹೂಂ, ಮೌನ ಹಲೋ ಹೇಳುವುದಿಲ್ಲ 

ಬದಲಿಗೆ ಹೌದು ಎಂಬಂತೆ ತಲೆಯಾಡಿತು. 

ಇನ್ನೇನು ಮಾತಾಡಲಿ ಇವಳ ಬಳಿ ? 

ಇವಳು ಗೆಳತಿಯಲ್ಲ 

ಆದರೆ ಜೀವಮಾನವಿಡಿ ಒಟ್ಟಿಗಿರುತ್ತಾಳೆ 

ಟಿ ವಿ ನೋಡುವಾಗ, ಪಕ್ಕದಲ್ಲಿ 

ಬಟ್ಟೆ ಮಡಚುವಾಗ ಎದುರಲ್ಲಿ 

ಅಡುಗೆ ಮನೆಯಲ್ಲಿ ಬೆನ್ನ ಹಿಂದೆಯೇ 

ಊಫ್! ಬೇಡದ ನೆರಳಿನಂತೆ ಸದಾ 

ಮಗು ಬಂದರೆ ಮಾಯ, 

ಫೋನಿನ ಸದ್ದಿಗೂ ಮಾಯ!

ಎಲ್ಲಿಗೆ ಹೋಗುತ್ತಾಳೋ ಮಹಾರ್ಯ್ತಿ! 

ಮಾತು ಬೆಳ್ಳಿ, ಮೌನ ಬಂಗಾರವಂತೆ

ಈ ಅಂತೆ, ಕಂತೆಗಳು ಎಲ್ಲವೂ

ಯಾವನೋ ಕಡು ವಾಚಾಳಿಯದ್ದಿರಬೇಕು!