ಕ್ರಿಸ್ಮಸ್!

ಕ್ರಿಸ್ಮಸ್ ಬಂದಾಗೆಲ್ಲಾ ನೆನಪಾಗುವುದು ವಾಮ್ (ಜಾರ್ಜ್ ಮೈಕಲ್ ಮತ್ತು ಆಂಡ್ರ್ಯೂ ರೆಗ್ಲೀ) ನ ಈ ಹಾಡು...

ಪ್ರತೀ ಯುಗಾದಿ ಹೊಸತನ ತರಲಿ ಅಂತ ನಾವು ಆಶಿಸಿದಂತೆಯೇ ಇದೆಯಲ್ಲವೇ ಈ ಹಾಡಿನ ಜಾಡೂ ? ಕಳೆದ ಕ್ರಿಸ್ಮಸ್ ನಲ್ಲಿ ಪ್ರೇಮ ನಿವೇದಿಸಿದ ಹುಡುಗ ಅದಾಗಲೇ ಮುರಿದು ಬಿದ್ದ ಸಂಬಂಧದ ಬಗ್ಗೆ ಹಾಡುತ್ತಿದ್ದಾನೆ. ವಿರಹಿಯೋರ್ವನ ದಟ್ಟ ಯಾತನೆ ಹಾಗೂ ಹೊಸ ಪ್ರೀತಿ-ಸಂಬಂಧದ ಬಗೆಗಿನ ಕನಸಿನ ಚಿಗುರೂ ಇದರಲ್ಲಿದೆ.
೧೯೮೪ರ ಈ ಹಾಡು ಇಂದಿಗೂ ಒಂದಷ್ಟು ವಿರಹಿಗಳ ರಾಷ್ಟ್ರಗೀತೆ ಆಗಿದ್ದರೆ ಆಶ್ಚರ್ಯವೇನಲ್ಲ. ಯಾವತ್ತೂ ಚಾಲ್ತಿಯಲ್ಲಿರುವ ಕ್ಲಾಸಿಕ್ ಹಾಡುಗಳಲ್ಲಿ ಇದೂ ಒಂದು. My all time fav.
http://www.youtube.com/watch?v=E8gmARGvPlI

ಹೀಗೊಬ್ಬಳು ಸೋಲಿಗಳು

ಉಪ್ಪಿನ ಕಣ್ಣೀರ ಜೊತೆ ಕಲೆಸಿದ್ದು 

ಕಹಿಯಾದ ಸೋಲಿನ ಗುಕ್ಕು

ಪ್ರತೀ ಗುಕ್ಕನ್ನೂ ನುಂಗಿದ್ದು

ಹತಾಶೆಯ ತಟ್ಟೆಯಲ್ಲಿಟ್ಟು

ಅಸಹಾಯಕತೆಯ ಈ ಭೋಜನ

ಬದುಕಿನ ಮೇಲಿನ ಅತ್ಯಾಚಾರ.

ದೇಹವ ಕೊಂದವನಷ್ಟೇ 

ಕೊಲೆಗಾರನಲ್ಲ

ನಿಜ

ನಿಜವೆನ್ನುವುದು ಯಾವುದು? 

ನೀ ಅಂದಿದ್ದು ನಿಜವೇ? ನಾ ತಿಳಿದುಕೊಂಡಿದ್ದೆ? 

ಅವರು ಬರೆದಿದ್ದೆ? ಇವರು ಒಪ್ಪಿಕೊಂಡಿದ್ದೆ? 

ಸುತ್ತಲಿನ ಕೋಟಿ ಮುಖಗಳಲ್ಲಿ ಅದಾವ ಮುಖವು ನಿಜ? 

ಶಿಲೆಯಲ್ಲಿ ಕೆತ್ತಿದ ಮಾತ್ರಕೆ ನಿಜವಾಗುವುದೇನು?

ತಾಳೆಗರಿಗಳಲಿ ಗೀಚಿದ್ದು ಮಾತ್ರ ನಿಜವೇನು?

ಪ್ರಾಚೀನವಾದುದಕ್ಕೆಲ್ಲ ನಿಜದ ಮುದ್ರಾಧಾರಣೆ ಇದೆಯೇನು? 

ಇಲ್ಲಿರುವುದು ನಿಜವೇ? ಹಾಗಾದರೆ ಇಲ್ಲದ್ದು ನಿಜವಲ್ಲವೇ?

ಇಷ್ಟಕ್ಕೂ ನಿಜವನ್ನು ಕಂಡವರೆಷ್ಟು ? ತಿಳಿದವರೆಷ್ಟು?

ಕಂಡದ್ದೂ, ತಿಳಿದದ್ದೂ ನಿಜವೇ ?

ಕೊನೆಗೆ ನೀವು ಹೌದು ಎಂದರೂ....ಅದೂ ನಿಜವೇ?

ಹರಿದು ಹೋಗುವುದೇ ಅದರ ಗುಣ
ನೀರಾಗಲಿ, ಸಂಬಂಧವಾಗಲಿ....

ವಿಷ ಕಹಿಯಿರಲಿಕ್ಕಿಲ್ಲ ಸೋಲಿನಷ್ಟು
ಸಾವು ಘೋರವಿರಲಿಕ್ಕಿಲ್ಲ ಬದುಕಿನಷ್ಟು 

ವಾಮನ

ನಾ ಬಲಿಯಾಗುತ್ತಲೇ ಹೋದೆ

ನೀ ತ್ರಿವಿಕ್ರಮನಾಗಲೇ ಇಲ್ಲ.

ಕೊನೆಗೆ ವಾಮನನೂ....