ಘಮಲು

ಪಕ್ಕದ ಮನೆಯ ಗಾಯತ್ರಿ ಅಮ್ಮ ಕೊಡೋ ಅನ್ನ, ದಾಳಿ ತೊವೆ, ಪತ್ರೊಡೆ 

ಮೂರನೇ ಮನೆಯ ಪಳನಿ ಅಂಕಲ್ ತರೋ ಗಜಗಾತ್ರದ ಸೀಬೆ ಹಣ್ಣು
ಅದರ ಪಕ್ಕದ ಮನೆಯ ನೇತ್ರಾ ಆಂಟಿ ಮಾಡುವ ಅಕ್ಕಿ ರೊಟ್ಟಿ, ಕಾಯಿ ಚಟ್ನಿ 
ಚಾಳಿನ ಕೊನೆಯ ಮನೆಯ ಫರೀದಕ್ಕ, ಅವರ ಮನೆಯಲ್ಲಿ ಸಿಗುವ ಬದಾಮು, ಖೀರು
ಬೀದಿ ದಾಟಿದರೆ ಆಲಮೇಲು ಆಂಟಿಯ ಗಮ ಗಮ ಪುಳಿಯೋಗರೆ
ಆ ಬೀದಿಯ ಕೊನೆಗೆ ಇಸ್ತ್ರಿ ಮಾಡುವ ಕುಮಾರ್ ಅಂಕಲ್ ಕೊಡೋ ನಿಂಬೆ ಹುಳಿ ಪೆಪ್ಪರಮಿಂಟು
ಅದರಾಚೆ ಬೀದಿಯ ಜಾನಪ್ಪ ಗೌಡರ ಮನೆಯ ಮುದ್ದೆ, ಅವರೇ ಹುಳಿ
ಅಲ್ಲೇ ಪಕ್ಕದಲ್ಲಿದ್ದ ದೊಡ್ಡ ಮನೆಯ ಲೂಸಿ ಆಂಟಿ ಮನೆಯ ಕ್ರಿಸ್ಮಸ್ ಕೇಕು
ಎರಡೇ ಬೀದಿ ದಾಟಿದರೆ ಪಲ್ಲೇದ್ ಆಂಟಿ ಮಾಡಿ ಕೊಡೋ ಬಿಸಿ ಜೋಳದ ರೊಟ್ಟಿ, ಬೆಣ್ಣೆ, ಪಲ್ಲೆ
ಬಜಾರಿನಲ್ಲಿ ಬಟ್ಟೆ ಅಂಗಡಿಯ ಹಿಂದೆಯೇ ಅಂಗಡಿಯವರ ಮನೆ, ಅಲ್ಲಿ ಮೆದ್ದು ಬಂದ ಪದರದ ಚಪಾತಿ, ತುಪ್ಪ, ಸಕ್ಕರೆ
ಬಾಲ್ಯ ಅಂದ್ರೆ ಇಷ್ಟೂ ಇಲ್ಲದಿದ್ರೆ ಹೇಗೆ ಹೇಳ್ರಿ, ಒಟ್ಟಿನಲ್ಲಿ ಇಡೀ ಮೂಡಿಗೆರೆ ನಮ್ದೆ ಕಣ್ರೀ!
ಇವನ್ನೆಲ್ಲ ನೆನೆದು ನನ್ನ ಪುಟಾಣಿ ಪುಟ್ಟಣ್ಣನಿಗೆ ಹೇಳಿದ್ರೆ
ಪಾಪ ಅವನಿಗೆ ಸಿಕ್ಕಿದ್ದು ಪಕ್ಕದ ಫ್ಲಾಟಿನ ಪೂಜೆಯ ಸಪಾತ ಭಕ್ಷ್ಯದ ಘಮಲು ಮಾತ್ರ